ಸುಂದರವಾದ ಕನ್ಯೆ ಬೇಕಾಗಿದ್ದಾಳೆ... !

ಡಾ. ಸಿದ್ರಾಮ ಕಾರಣಿಕ

ಸುಂದರವಾದ ಕನ್ಯೆ ಬೇಕಾಗಿದ್ದಾಳೆ
ದಯವಿಟ್ಟು ಕ್ಷಮಿಸಿ
ಸುಂದರತೆಯ ಬಗೆಗೆ ನನಗೆ 
ವ್ಯಾಖ್ಯಾನ ಬರೋದಿಲ್ಲ !
ಬಣ್ಣದ ಬಗೆಗೆ ತಕರಾರು ಇಲ್ಲ
ಉದ್ದ-ಗಿಡ್ಡ, ದಪ್ಪ-ತೆಳು 
ಯಾವ ಸಮಸ್ಯೆಯೂ ಇಲ್ಲ
ಮನಸ್ಸನ್ನು ಅರ್ಥ ಮಾಡಿಕೊಳ್ಳೋಳು
'ಅರ್ಥ'ದ ಗೊಡವೆಗೆ ಬೀಳದವಳು
ಹೇಗಿದ್ದರೂ ನಡೇದೀತು ;
ದಯವಿಟ್ಟು ಗಮನಿಸಿ
ಕನ್ಯೆ ಬೇಕಾಗಿದ್ದಾಳೆ
ಮುದ್ಧಣನಿಗೆ ಮನೋರಮೆಯಂತವಳು ಬೇಕಾಗಿದ್ದಾಳೆ !
ರಾಗಮನಂತೆ ನಾನು ತೊಡ ಸಂಧಿ, 
ಮೊಲೆ, ಮೂಗು ನೋಡುಗನಲ್ಲ !
ಅನಂತಮೂರ್ತಿಯಂತೆ ಸಿಕ್ಕಾಗ ಸೀರುಂಡೆ ಎನ್ನೋನಲ್ಲ !
ಬೇಂದ್ರೆಯ ಗೆಣೆಯ ಆಗಲಾಗದು ;
ಕುವೆಂಪು ಬರೆದ ನಾಯಿ ಕೂಡ ಅಲ್ಲ !
ಕಣವಿಯ ರೇಲು, ನಮಾಜು 
ಸಮಜೋತಿಯಲ್ಲ ನನಗೆ !
ನಗಬೇಕು ; ನಗಿಸುತ್ತ ಇರಬೇಕು
ಅಂದ್ರೆ ಧಾರವಾಡ ಬಸ್ಟ್ಯಾಂಡಿನ ಬದಿಯವಳೂ ಅಲ್ಲ
ಬೇಕಾಗಿದ್ದಾಳೆ ನನ್ನೊಂದಿಗೆ ಸಂಗಾತ ಬಯಸೋಳು ;
ಮತ್ತಿನಲ್ಲೂ ಗತ್ತುಗಾರಿಕೆ ತೋರುವಂಥವಳು !
ಯಾರಾದರೂ ಇದ್ದೀರಾ ? ಯಾರಿಗಾದರೂ ಗೊತ್ತಾ ?
ಹುಡುಕಿ ಕೊಡಿ ; ನನ್ನ ಗೆಳೆಯನಿಗೆ ಇನ್ನೂ ಮದುವೆಯಾಗಿಲ್ಲ !