ಹೆಮ್ಮರವಾಗಲಿ ಎದೆಗೆ ಬಿದ್ದ ಅಕ್ಷರ ಬೀಜ !

ಸಿದ್ಧರಾಮ ಹಿಪ್ಪರಗಿ, ಧಾರವಾಡ

 

ಪ್ರತಿದಿನವೂ ಬೀದಿಯಲಿ ಕಾಣುವುದಿಲ್ಲ

ಬಳಸಿ ಬಿಸಾಡುವ ದಿನಸಿ ವಸ್ತುವದಲ್ಲ

ಚೌಕಾಸಿಗೆ ಚಿಲ್ಲರೆ ವಿಷಯವದಲ್ಲ

ಕೊಳ್ಳಲು ಅಂಗಡಿಯಲಿ ಸಿಗುವುದಲ್ಲ

ನಿರಂತರ ಹರಿಯುವ ಅಂತರ್ವಾಹಿನಿ !

ಅರಿವಿರದ ಅಂದಿನ ಕಾಲದಲಿ

ಅಂದಿನ ಸಂದರ್ಭದ ಅವಶ್ಯಕತೆಯಲಿ

ಶ್ರೇಣೀಕರಣ, ವಸಾಹತೀಕರಣದಲಿ

ಕಾರಣವಿಲ್ಲದೇ ನಡೆದ ಶೋಷಣೆಗಳಲಿ

ಜಾಗೃತಗೊಂಡ ವಿರೋಧಿ ಪ್ರತಿಭಟನೆಯಲಿ

ಅಸ್ತ್ರಗಳಾಗಿ ಬಳಸಿಕೊಂಡ ಸಮಾಜವಾಹಿನಿ !

ವೇಗದ ತಾಂತ್ರಿಕತೆಯ ಇಂದಿನ ಕಾಲದಲಿ

ಬದಲಾದ ಯೋಚನಾ ಲಹರಿಗಳಲಿ

ಜಾಗತೀಕರಣ, ಮತಭ್ರಾಂತೀಕರಣಗಳಲಿ

ಎದುರಾಗುತಿರುವ ಆತಂಕಗಳಲಿ

ಎದುರಿಸಬೇಕಿರುವ ಸವಾಲುಗಳಲಿ

ಅಡಗಿಕೊಂಡಿರುವ ಅಜೆಂಡಾಗಳಲಿ

ಸ್ಮಾರ್ಟ ಶೈಲಿಯ ಶೋಷಣೆಗಳಲಿ

ಮುನ್ನುಗಬೇಕಾಗಿರುವ ದೃಢಹೆಜ್ಜೆಗಳಲಿ

ಆಶಾಭಾವ ಮೂಡಿಸುವ ಪ್ರಗತಿಪರತೆಗಳಲಿ

ರಾಜಕೀಯ-ಸಾಮಾಜಿಕ-ಸಾಂಸ್ಕೃತಿಕ ಹೊಳಹುಗಳಲಿ

ಸಮಾನತೆಯ ಕನಸು ಕಾಣುವ ಕ್ಷಣಗಳಲಿ

ಹೆಮ್ಮರವಾಗಲಿ ಎದೆಗೆ ಬಿದ್ದ ಬೀಜ ಅಕ್ಷರವಾಹಿನಿ !

ಜಗದ ಶ್ರಮಿಕ ಅಶಕ್ತರ ಭಾಗ್ಯೋದಯಕಾಗಿ

ಅಕ್ಷರಜ್ಯೋತಿಯ ಜಾಗೃತಿಯ ಮುನ್ನಡೆಗಾಗಿ

ನಂಬೋಣ ಚಳುವಳಿಗಳ ದಾರಿ 

ಇದೆಯಲ್ಲವೇ ಬೆನ್ನಿಗೆ ಚರಿತ್ರೆಯ ಹೆಗ್ಗುರಿ !